" Ab Lowt Aao " ( Aek Afsancha )

Au®a · #1 (**permalink**) 24-06-2008, 04:50 AM

Yadai'n Talkh Ho'n Ya Sheeree'n Un Say Daman Churana Aasan To Nahi, In Say Jitna Bhago Yeh Kisi Na Kisi Mor Par Achanak Hamai'n Is Tarha Daboch Laiti Hai'n Kay Pal Bhar Mai'n Ham Phir Un Hi Yado'n Mai'n Pohanch Jatay Hai'n Jin Say Bhagnay Ki Sai Kartay Karaty Dil.O.Jaan Halkaan Ho Jatay Hai'n...

'' Net Beeti '' Kay Unwan Nay Mujhay Lamha Bhar Mai'n Kai Saal Peechay Is Tarha Dhakail Diya Hay Kay Lagta Hay Mai'n Un Yado'n Ko Pal Bhar Kay Liye Bhi Na Bhooli Thi...

Sana Say Mairi Mulaqaat Aik Urdu Forum Mai'n Hui Thi...Sana Owr Mai'n Forum Mai'n Her Jagha Sath Sath Nazar Aatay Thay...Pata Hi Na Chala Kay Replies Likhtay Likhtay Kab Ham Aik Doosray Ko Khud Say Qareeb Tar Mehsoos Karnay Lagay...Aik Doosray Kay Liye Pur'Khuloos Jazbaat Hamaray Replies Say Saaf Jhalaktay Thay...

Aik Din Mujhay Sana Ka Pehla Mukhtasir Sa PM Mila...Jis Ko Parh Kay Maira Chehra Firt-e-Musarrat Say Khil Utha...Us Kay Mukhtasir Say PM Mai'n Mairay Liye Khuloos Ka Samandar Mojzan Tha...Woh Mujh Say Yahoo Par Baat Karnay Ki Khuahish Mand Thi...

Mai'n Nay Us Ko Fowran Jawabi PM Likha Jis Mai'n Wazey Kar Diya Kay Yahoo Par Raabta Karna Mairay Liye Mumkin Nahi...Warna Urdu Forum Say Bhi Haath Dhona Parai'n Gay...

Sana Nay Israar Kiye Baghair Mujhay Aik Owr Raah Sujhaai Kay Us Nay Haal Hi Mai'n Aik Urdu Forum Ki Bunyaad Rakhi Hay Jis Mai'n Chat Room Bhi Mowjood Hay...Is Chat Room Mai'n Ham Dono'n Hi Ho'n Gay Owr Dil Bhar Kay Batai'n Karai'n Gay...

Mujhay Us Ki Yeh Tajweez Bouhat Pasand Aai...Us Nay Fata Fat Mujhay Apnay Forum Mai'n Regesterd Kar Kay Maira User Name Owr Password Mujhay Aglay PM Mai'n Likh Bhaijay...

Pehli Hi Chat Mai'n Ham Ko Kisi Qism Ki Ajnabiyat Ka Aehsaas Na Huwa...Yahi Lagta Tha Kay Ham Aik Doosray Ko Daikh Rahay Hai'n, Aik Doosray Ki Aawaz Hamari Sama'at Say Takra Rahi Hay...Ham Ird Gird Say Bay Niyaaz Ghanto'n Batai'n Kartay...Bal Kay Yeh Kehna Durust Ho Ga Kay Mai'n Ghanto'n Us Ki Batai'n Sunti...

Sana Bay'Tahasha Bolti Thi, Na Janay Kab Say Us Kay Andar Aik Lawa Sa Khowl Raha Tha Jo Mujh Say Miltay Hi Phat Para Tha...Mai'n Ziyada Tar, Hmm Hmm, Acha, Phir Kiya Huwa, Likh Kar Apni Mowjoodgi Ka Aehsaas Qayem Rakhti...Owr Woh Mujh Say Musalsal Baato'n Mai'n Masroof Rehti...

Mai'n Nay Us Chat Room Mai'n Jis Sana Ko Jana Us Ka Naqsh Mairay Dil.O.Dimaagh Par Roz-e-Awwal Ki Tarha Aaj Bhi Sabt Hay...

Sana Ki Bato'n Mai'n Rabt Ka Fuqdaan Tha Jis Say Mairay Dimagh Mai'n Sainkro'n Sawaal Uthtay...Mai'n Nay Yahi Munasib Samjha Kay Is Ko Dil Ki Bharaas Achi Tarha Nikaal Lainay Doo'n Us Kay Baad Hi Mai'n Jo Kuch Poochna Chahti Hoo'n Us Say Pooch Daloo'n Gi...

Sana Ki Batai'n Jis Tarha Bay Rabt Theen, Us Ki Yadai'n Bhi Usi Tarha Bay Rabt Hai'n...Mai'n Chahoo'n Bhi To Mairay Liye Mumkin Nahi Kay Mai'n Us Ki Yado'n Mai'n Rabt Paida Kar Sakoo'n...Jo Baat Jis Tarha Yaad Aa Rahi Hay Usay Usi Tarha Likhti Chali Ja Rahi Hoo'n...

Sana Nay Mujhay Jo Kuch Bataya Us Par Aaj Bhi Mai'n Aabdeeda Hoo'n...Maira Dil Aaj Bhi Us Kay Liye Shaq Huwa Jata Hay...

Sana Aik Khatay Peetay Gharanay Say Taaluq Rakhti Thi... Aik Aesay Gharanay Say Jis Mai'n Khandani Riwayaat Ki Aehmiyat Baitiyo'n Ki Khushiyo'n Say Kahee'n Ziyada Thi...

Sana Teen Behno'n Mai'n Sab Say Choti Thi...Sab Say Bari Behen Shadi Kay Baad Beroon-e-Mulk Muqeem Thee'n...Sana Ki Bari Behen Hina Ki Baat Apnay Chacha Kay Baitay Zaki Say Bachpan Mai'n Hi Pakki Kar Di Gai Thi Jis Kay Liye Hina Owr Zaki Ab Bilkul Razamand Na Thay...Zaki Dubai Mai'n Aik Achi Post Par Faaiz Tha...

Sana Jitni Darpok Thi, Hina Utni Hi Sarkash Waqay Hui Thi....
Hina Owr Zaki Kay Saaf Inkaar Kay Baad Khandani Riwayaat Nibhanay Kay Liye Zaki Ki Razamandi Say Sana Ka Nikah Zaki Say Phone Par Kar Diya Gaya Jis Mai'n Sana Ki Razamandi Shamil Na Thi...Sana Ro Ro Kay Pagal Hoti Rahi Laikin Woh Inkaar Ki Jurrat Say Mehroom Thi...

Zaki Albatta Sana Say Nikah Par Bouhat Khush Tha...Zaki Aurat Ko Pair Ki Jooti Say Ziyada Aehmiyat Dainay Ka Qaail Na Tha...Aurat Ko Daba Kay Rakhna Us Ki Sarisht Mai'n Shamil Tha...Us Ka Mizaaj Kisi Say Posheeda Na Tha Phir Bhi Sana Kay Ghar Walo'n Nay Khandani Riwayaat Par Sana Ko Qurbaan Kar Diya...

Zaki Ki Khuahish Ko Madd-e-Nazar Rakhtay Huway Matric Kartay Hi Sana Ki Taleem Ka Silsila Munqita Karwa Diya Gaya Jis Ka Sana Ko Dili Ranj Tha...Woh Andar Hi Andar Khowlti Rehti Laikin Kuch Bhi Karnay Say Qasir Thi...Zaki Kay Naam Say Bhi Us Ki Rooh Kaanpnay Lagti...Laikin Us Kay Ikhtiyar Mai'n Kuch Na Tha...

Bachpan Say Hi Mehroomiyo'n Owr Na'Insafiyo'n Nay Sana Kay Gird Apna Ghaira Tang Kiye Rakha...Jaisay Jaisay Uskay Qadam Bachapan Ki Daihleez Phalangtay Aagay Barhtay Rahay, Waisay Waisay Meroomiyo'n Owr Talkhiyo'n Ka Yeh Ghaira Us Kay Gird Tang Say Tang Hota Chala Gaya...Us Ki Rooh Pharphara Kay Reh Jati Magar Koi Raah-e-Faraar Sujhai Na Daiti...

Us Kay Kamray Mai'n Hafto'n Kisi Ko Jhanknay Ki Fursat Na Thi Kay Sana Kiya Kar Rahi Hay, Kin Bato'n Mai'n Uljhi Hui Hay...Maa'n Baap Owr Behno'n Ki Mohabbat Owr Tawajoh Say Mehroom Sana Computer Say Dil Behlaya Karti...

Internet Nay Sana Ko Aik Nai Duniya Say Mutarif Karaya Tha Jis Mai'n Woh Rafta Rafta Doobti Chali Ja Rahi Thi...Net Ki Duniya Waqti Towr Par Usay Ird Girg Ki Talkhiyo'n Say Bay Khabar Kar Daiti...

Aik Urdu Forum Kay Tawassut Say Sana Ki Dosti Jibran Say Hui...Dosti Ka Aaghaz Jibran Nay Kiya Jis Ka Sana Nay Bharpoor Jawaab Diya...

Dosti Kay Aaghaz Mai'n Hi Sana Say Poochay Gaey Jibran Kay Sawalo'n Kay Jawaab Jhoot Par Mabni Thay...Sana Nay Apna Aap Jibran Say Chupaey Rakha...Naam Tak Sahi na Bataya...Sana Nay Jibran Ko Jo Kuch Bataya, Woh Sab Us Par Kisi Na Kisi Hawalay Say Beet Chuka Tha...Laikin Woh In Bato'n Ko Doosray Rang Mai'n Jibran Ko Batati Rahi...

Waqt Guzarnay Kay Saath Saath Yeh Dosti Mazboot Hoti Chali Gai...Kab Yeh Dosti Mohabbat Ka Rukh Ikhtiyar Kar Gai Dono'n Ko Pata Hi Na Chala...

Jibran Pehlay Din Say Hi Sab Kuch Sach Sach Sana Ko Batata Raha...Ab Sana Ki Himmat Na Hoti Thi Kay Woh Jibran Say Kaihti Kay Mai'n Nay Jhoot Ka Sahara Liya Hay...Woh Apnay Bolay Huway Jhoot Is Dar Say Nibhati Chali Gai Kay Kahee'n Jibran Ka Saath ***** Na Jaey...Dil.O.Jaan Say Jibran Ko Chahnay Kay Ba'Wajood Woh Sach Boltay Boltay Reh Jati...Aik Jhoot Ko Chupanay Kay Liye Doosra Jhoot Us Ki Zabaan Par Hota...

Us Ka Zameer Usay Kachokay Lagata, Sari Raat Woh Tarapti Rehti...Roz Apnay Dil Mai'n Aehed Karti Kay Aaj Jibran Ko Sab Kuch Sach Sach Bata Day Gi...Laikin Woh '' Aaj '' Kabhi Na Aati Thi...

Jibran Ko Patay Hi Woh Sab Kuch Bhool Jati...Pyar.O.Mohabb at Kay Do Bolo'n Say Mehroom Sana Nay Jibran Ko Shiddat Say Chaha, Dil Say Us Ko Apna Jana...

Jibran Kay Sang Us Nay Sadiyo'n Ka Safar Dino'n Mai'n Tay Kar Liya Tha...Dono'n Ko Aik Doosray Kay Bina Lamha Bhar Chain Na Aata Tha...Aik Doosray Ko Apnanay Kay An'Ginat Khuaab Un Ki Soti Jaagti Aankho'n Mai'n Basay Rehtay...

Au®a · #2 (**permalink**) 24-06-2008, 04:52 AM

Aik Doosray Ko Daikhay Bina Hi Unho'n Nay Aik Doosray Ki Bato'n Say Is Had Tak Aik Doosray Ko Jaan Liya Tha Kay Khoobsurti, Bad'Soorti Ab Un Kay Liye Koi Aehmiyat Na Rakhti Thi...Unhai'n Aik Doosray Ki Seerat Say Deewangi Ki Had Tak Pyar Ho Gaya Tha...

Jibran Kay Taqazay Ab Barhtay Chalay Ja Rahay Thay... Woh Ab Sana Say Milna Chahta Tha, Usay Daikhna Owr Hamaisha Kay Liye Apnana Chahta Tha...Sana Ki Bhi Dili Khuahish Yahi Thi Laikin Woh Mazeed Jhoot Bol Bol Kay Usay Taalti Rahi, Us Ki Samajh Mai'n Na Aata Tha Kay Woh Karay To Kiya Karay?

Woh Jibran Ko Khonay Kay Khayal Say Apnay Bolay Jhoot Nibhati Chali Gai Kay Jibran Ko Agar Pata Chal Gaya Kay Mai'n Nay Jhoot Ka Sahara Liya Hay To Woh Mujhay Chowr Day Ga...

Judai Ka Khayal Her Khayal Par Is Tarha Hawi Ho Jata Kay Woh Andhi Ho Jati...Jibran Ka Mobile Number Us Kay Dil.O.Dimagh Mai'n Mehfooz Tha Laikin Woh Phone Kartay Darti Thi Kay Ghar Walo'n Ko Pata Chal Gaya To Qayamat Aa Jaey Gi...

Sana Kay Liye Poori Kaenaat Computar Mai'n Samaai Hui Thi Kay Achanak Us Ka Computer Kharab Ho Gaya...Sana Ki To Jaan Par Hi Ban Aai...Computer Theek Honay Chala Gaya To Jibran Say Raabtay Ka Zaria Khatam Ho Gaya...

Jibran Say Lamha Bhar Ki Judai Us Kay Liye Suhaan-e-Rooh Thi... Us Ki Samajh Mai'n Na Aata Tha Kay Karay To Kiya Karay?...

Aakhir Kaar Us Nay Himmat Ki Owr Ghar Mai'n Kaam Karnay Wali Mulazima Ko Paiso'n Ka Lalach Day Kar Kisi Na Kisi Tarha Ghar Say Nikal Khari Hui...Sarak Par Chaltay Huway Usay Ird Gird Ka Koi Hosh Na Tha...Jibran Kay Khayalo'n Mai'n Khoi... Woh Chalti Rahi... Ghar Say Qareeb Aik P.C.O Say Us Nay Jibran Ko Ph. Kiya...

Jibran Ki Awaaz Suntay Huway Us Ka Sara Dar.O.Khof Jata Raha...Dil Chahta Tha Kay Yeh Awaaz Isi Tarha Us Kay Kano'n Mai'n Goonjti Rahay...Jibran Usay Tasalli Daita Raha Kay Pareshan Na Ho Computer Jald Theek Ho Jaey Ga...Jab Kay Sana Say Raabtay Kay Baghair Jibran Ka Apna Bura Haal Tha...Jibran Nay Hi Usay Samjhaya Kay Dair Ho Gai Hay Tum Ghar Jao Warna Ghar Walo'n Ko Shak Ho Jaey Ga...

Sana Jaisay Khuaab Say Jaagi...Jibran Say Baat Karnay Ki Khushi Par Ghar Walo'n Ka Khowf Hawi Honay Laga To Woh Jaldi Say Ph. Rakh Kay P.C.O Kay Larkay Ko Baghair Ginay Paisay Day Kar Bahar Nikal Aai...

Apni Hi Dhun Mai'n Woh Taqreeban Bhaagti Hui Ghar Ki Taraf Barh Rahi Thi Kay Aik Taiz Raftaar Car Say Us Ka Buri Tarha Accident Ho Gaya... Usi Car Walay Nay Usay Hospital Pohncha Kay Sana Say Phone Number Lay Kay Us Kay Ghar Walo'n Ko Ittila Di...

Sana Kay Ghutnay Is Haadsay Mai'n Buri Tarha Majrooh Huway Thay Jin Ka Doctors Ko Fowri Towr Par Operation Karna Para...

Ghutno'n Kay Takleef Day Operation Kay Amal Say Guzarnay Kay Ba'Wajood Yeh Aehsaas Us Kay Hawaas Par Ghalib Tha Kay Woh Jibran Say Raabta Kis Tarha Karay?...Operation Ki Takleef Owr Jibran Say Doori Kay Aehsaas Nay Us Kay Hawaas Cheen Say Liye Thay...

Ghar Walo'n Kay Poochnay Par Us Nay Cheekh Cheekh Kar Khud Ko Kosna Shuru Kar Diya Kay Kaash Yeh Haadsa Mairi Jaan Lay Laita...Mai'n Kiyu'n Bach Gai? Mujhay Mar Janay Diya Hota...Us Par Junooni Kefiyat Tari Honay Lagi...Ghar Walo'n Kay Liye Sana Ka Yeh Roop Ajnabi Tha Woh Waqti Towr Par Khamosh Ho Gaey...

Ghar Walay Yahi Samjhay Kay Accident Owr Operation Sana Mai'n Tabdeeli Ka Baais Bana Hay...

Ghar Walo'n Kay Idher Udher Hotay Hi Sana Nay Jibran Ko Hospital Say Phone Kiya Laikin Is Haadsay Say La Ilm Hi Rakha...

Doctors Usay 10 Din Say Pehlay Chutti Dainay Par Aamada Na Thay Laikin Sana Nay Aik Hangama Khara Kar Diya...

Jibran Ki Mohabbat Owr Raabta Taqreeban Munqita Ho Janay Say Sana Sar Say Pair Talak Badal Kay Reh Gai Thi.. Daikhnay Walay Yaqeen Na Kartay Kay Yeh Wahi Darpok Si Sana Hay Jis Ki Awaaz Ba'Mushkil Nikalti Thi...

Ghar Walo'n Owr Doctors Ki Us Nay Aik Na Suni Owr Doctors Say Checkup Karwanay, Her Tarha Hidayaat Par Amal Ka Wada Kar Kay Teesray Din Ghar Aa Gai...In Teen Dino'n Mai'n Bhi Aik Minute Ka Hi Sahi Woh Phone Kar Kay Jibran Ki Aawaz Apni Rooh Mai'n Utar Zaroor Laiti...

Ghar Aai To Dil.O.Jaan Par Sarshari Si Cha Gai Kay Us Ka Computer Sahi Ho Gaya Tha...Us Ka Raabta Jibran Say Bahaal Ho Gaya Tha...

Taango'n Mai'n Uthti Shadeed Tareen Dard Ki Teeso'n Ko Apnay Ander Dabanay Ki Koshish Mai'n Woh Nidhaal Ho Ho Jati Laikin Uff Na Karti Kay Kahee'n Dobara Hospital Mai'n Admit Na Kar Diya Jaey...

Stiches Owr Half Plaster Say Jakri Tangai'n Zara Si Herkat Par Usay Dard Say Bayhaal Kar Daitee'n Jin Kay Liye Woh Kai Kai Baar Pain Killer Istimaal Karti...

Us Ki Daikh Bhaal Karnay Kay Liye Din Raat Ki Mulazima Alag Say Rakh Di Gai Thi...Jisay Woh Raat Ko Zabardasti Us Kay Cuarter Mai'n Bhaij Daiti...Owr Khud Computer On Kar Laiti...Tanghai'n Samnay Wali Kursi Par Rakh Kar Woh Ghalat Position Mai'n Baithi Jibran Say Saari Raat Batai'n Kiye Jati...

Jibran Ab Bhi Is Haadsay Say Bay'Khabar Tha...Sana Khush Thi Kay Us Kay Saath Yeh Haadsa Paish Aaya...Ghutno'n Mai'n Uthti Na Qabil-e-Bardasht Teesai'n Us Kay Dil.o.Dimagh Ko Sukoo'n Bakhshtee'n...

Jibran Say Jo Batai'n Posheeda Thee'n Un Ki Saza Us Nay Khud Ko Dainay Ka Faisla Kar Liya Tha...Woh Jo Jibran Kay Bina Saans Na Laiti Thi Us Nay Khud Ko Saza Suna Di Thi Kay Jibran Ki Zindagi Say Is Tarha Niklo Kay Woh Tum Say Nafrat Karnay Lagay...Tum Say Nafrat Hi Us Kay Jeenay Ka Sabab Banay Ga...Tum Say Nafrat Hi Kay Saharay Woh Yeh Sab Kuch Bhula Paey Ga...Sanbhalta Chala Jaey Ga...

Jibran Ko Woh Rafta Rafta Mayoosi Kay Samander Mai'n Dhakelnay Lagi...Umeed Kay Saath Saath Na Umeedi Ka Aehsaas Jibran Kay Dil.O.Dimagh Mai'n Shiddat Say Bithanay Lagi...

In Sab Marhalo'n Mai'n Us Ki Zaat Kirchiyo'n Ki Tarha Bikhar Kay Reh Gai...In Kirchiyo'n Nay Us Ki Rooh Tak Chalni Kar Di Thi...Laikin Usay Uff Kiye Baghair Apnay Jibran Ko Her Soorat Tootnay Say Bachana Tha...

Jibran Ko Tootnay Say Bachanay Kay Liye Woh Khud Toot'ti Rahi, Bikharti Rahi...

Jibran Jo Kay Pehlay Hi Mayoos Tha Ab Mazeed Mayoos Hota Chala Gaya...Usay Bhi Milan Na Mumkin Sa Nazar Aanay Laga ...Sana Kay Baghair Jibran Ki Halat Ghair Honay Lagti...Baaz Marhalo'n Par Sana Ki Himmat Jawab Dainay Lagti Owr Woh Phoot Phoot Kar Ronay Lagti Jin Mai'n Jibran Kay Aansu Bhi Shamil Ho Jatay...

Saari Saari Raat Ghalat Position Mai'n Baithnay Say Sana Ki Ghutno'n Kay Sath Sath Reerh Ki Haddi Bhi Buri Tarha Mutasir Ho Rahi Thi...Jis Ka Aehsaas Bhi Us Nay Jibran Ko Na Honay Diya...

Sirf Aik Martaba Aesa Huwa Tha Kay Baato'n Kay Dowran Pait Mai'n Dard Ka Bahana Kar Kay Woh 5 Minutes Kay Liye Bister Par Ja Laiti Thi...Jis Say Jibran Pareshan Ho Utha Tha...Sana Dobara Aa Kar Jibran Say Bato'n Mai'n Magan Ho Gai Thi Owr Apni Taraf Say Her Tarha Ka Itminaan Dila Chuki Thi...

Apni Zaat Ko Mukammal Faramosh Kiye Woh Us Din Ka Sabab Banati Chali Gai Jab Usay Jibran Ko Haqeeqat Is Tarha Batana Thi Kay Jibran Ki Shadeed Mohabbat Shadeed Nafrat Mai'n Badal Jaey...

Au®a · #3 (**permalink**) 24-06-2008, 04:53 AM

Sana Jaan Boojh Kay Jibran Ko Shak.O.Shubhay Mai'n Mubtila Karnay Lagi...Us Nay Khud Say Intiqaam Lainay Ka Silsila Jari Rakha...

Jibran Ab Bouhat Ulajh Kar Reh Gaya Tha...Sana Ki Kai Batai'n Us Ki Samajh Say Bala Tar Thee'n...Jin Say Kai Martaba Jibran Ko Aehsas Hota Kay Sana Jhoot Ka Sahara Lay Rahi Hay...

Aakhir Kaar Woh Din Aa Hi Pohncha, Jis Kay Baray Mai'n Soch Kar Hi Sana Ki Rooh Fana Hoti Thi...

Us Ki Kisi Baat Par Jibran Nay Sakhti Say Kaha Kay '' Sana Tum Jhoot Bol Rahi Ho ''...

Sana Kay Ander Pal Bhar Mai'n Qayamat Bapa Ho Gai...Us Kay Ander Dhamakay Say Honay Lagay... Laikin Ab Woh Sab Kuch Bhugatnay Kay Liye Tayaar Ho Chuki Thi...

Woh Bay Rabt Andaaz Mai'n Jibran Ko Sab Kuch Sach Sach Batati Chali Gai...Jaanti Thi Kay Is Waqt Jibran Ki Zaat Zalzalo'n Ki Zadd Mai'n Hay Laikin Ab Woh Qadam Peechay Hatanay Ki Soorat Mai'n Na Thi...Jibran Kay Liye Ab Yahi Behter Tha...Jibran Ki Aainda Zindagi Kay Liye Is Sachai Say Parda Uthna Bouhat Zaroori Tha...

Sab Kuch Sachaai Say Batatay Huway Us Nay Apni Bato'n Mai'n Aik Jhoot Phir Shamil Kar Diya Kay '' Mujhay Zaki Say Bouhat Mohabbat Thi, Mairi Khushi Owr Razamandi Say Hi Maira Nikah Zaki Say Kiya Gaya Tha...Zaki Mujhay Na Milta To Mai'n Apna Ghar Hamaisha Kay Liye Chowr Daiti...Mai'n To Zaki Ko Hi Chahti Thi Kay Achanak Net Par Tum Say Mulaqaat Ho Gai...

Abhi Sana Poori Tarha Sachai Bay'Naqaab Bhi Na Kar Paai Thi Kay Jibran Nay Aik Dam Say Hi Silsila Munqita Kar Diya...Is Say Ziyada Sunnay Ki Us Mai'n Taab Hi Kaha'n Thi...

Us Din Kay Baad Jibran Owr Sana Ka Aik Doosray Say Koi Raabta Na Huwa...

Jibran Say Juda Ho Kay Sana Kin Marhalo'n Say Guzri? Woh Sab Suntay Huway Maira Apna Wujood Lagta Tha Kay Zalzalo'n Ki Zadd Mai'n Hay...

Sana Roti Rahi Kay Mairay Baghair To Jibran Aik Aik Pal Tarapta Tha , Mairay Baghair Us Par Kiya Kuch Guzar Gai Ho Gi? Mairay Jibran Nay Sab Kaisay Saha Ho Ga? Kitni Aziyat Utahi Ho Gi Mairay Jibran Nay...Mai'n Jo Usay Zara Pareshan Na Daikh Sakti Thi, Kis Buri Tarha Mai'n Nay Jibran Ko Majrooh Kar Diya ... Usay Kis Nay Sanbhala Ho Ga?...Mujh Say Usay Nafrat Ho Chuki Ho Gi...Maira Jibran Ab Mujh Say Nafrat Karta Hay...Sana Phoot Phoot Kar Ro Rahi Thi...

Mai'n Ab Us Say Woh Sawalaat Karnay Kay Liye Buri Tarha Bay'Chain Thi Jo Mairay Zehen Ko Tah.O.Bala Kar Rahay Thay...Laikin Sana Ki Batai'n Abhi Khatam Na Hui Thee'n...Mujhay Us Ki Batai'n Khatam Honay Ka Intizaar Karna Tha...

Sana Nay Khud Ko Aik Saza Owr Dainay Ka Faisla Kiya...Kisi Forum Mai'n Aik Owr Dosti Bilal Say Ki...Pehla Jumla Jo Us Nay Bilal Say Kaha Woh Yeh Tha Kay '' Mai'n Tum Say Aik Haftay Ki Dosti Karna Chahti Hoo'n, Bolo Manzoor Hay? '' Bilal Kay Liye Shayed Yahi Aik Jumla Attraction Ka Sabab Bana Owr Woh Yahoo Par Fowran Chala Aaya...

Pehlay Hi Din Sana Nay Woh Sab Kuch Bilaal Kehna Shuru Kar Diya Jo Kay Jibran Tak Say Poori Tarha Keh Na Saki Thi... Sana Nay Online Hotay Hi Web Cam Bhi On Kar Diya ...Ab Bilal Usay Achi Tarha Daikh Bhi Raha Tha Owr Us Ka Kaha Sun Bhi Raha Tha...

Bachpan Say Lay Kar Jibran Ki Judaai Tak Ki Aik Aik Baat Bilal Say Woh Batati Chali Gai...Jibran Ki Judai Nay Usay Her Dar.O.Khof Say Yeksar Bay Gana Kar Kay Rakh Diya Tha...

Bilal Waqai Sana Ka Dost Sabit Huwa...Sana Ki Kahani Nay Jaha'n Us Ko Hila Kar Rakh Diya Tha Wahee'n Woh Sana Ki Shakl.O.Soorat Say Bhi Mutasir Ho Gaya Tha...

Sana Us Ki Bato'n Par Ro Ro Kar Kehti Kay Bilal Tum Mairay Dost Ho Owr Tum Nay Mujhay Achi Tarha Daikh Liya Hay...Maira Jibran Jo Maira Sab Kuch Tha, Woh To Mujhay Is Tarha Daikh Hi Na Saka...

Jibran Say Baat Mai'n Nay Hamaisha Night Bulb Ki Madham Roshni Mai'n Ki...Owr Tum Say Baat Kartay Huway Maira Kamra Roshni Say Nahaya Rehta Hay...

Tum Say Dosti Ka Aaj Aakri Din Hay Owr Tum Woh Sab Kuch Jaan Chukay Ho Jo Mai'n Apnay Jibran Say Kehna Chahti Thi...Mairi Yeh Hi Saza Hay Kay Jibran Say Mai'n Kuch Sahi Say Keh Na Saki...Mairay Wujood Say Nafrat Us Ko Sanbhaal Hi Lay Gi...Bilal, Mujh Say Bichar Kar Maira Jibran Kaisay Kaisay Tarpa Ho Ga...Haqeeqat Jaan Kar Us Par Gham Ka Pahaar Toot Para Ho Ga...Us Ki Zindagi Mairi Wajha Say Tah.O.Bala Ho Gai...Mai'n Khud Ko Kabhi Muaaf Nahi Karoo'n Gi...Khud Say Intiqaam Loo'n Gi...

Bilal, Sana Kay Liye Dil Ki Gehrai Say Mukhlis Sabit Huwa Tha...Woh Sana Ko Samjhata Raha Laikin Sana Apni Baat Par Dati Rahi Kay Mai'n Nay Apnay Jibran Ko Jo Dukh Diye Hai'n Un Ka Intiqam Khud Say Hamaisha Loo'n Gi...Khushi Ki Koi Kiran Apnay Qareeb Na Aanay Doo'n Gi... Khud Say Intiqaam Hi Ab Mairi Zindagi Ka Maqsad Hay...

Bilal Ki Her Naseehat Us Nay Aik Kaan Say Sun Kar Doosray Say Nikal Bahar Ki...

Sana Ki Aik Taza Tareen Tasweer Bilal Dosti Ki Yaadgar Kay Towr Par Apnay Paas Rakhna Chahta Tha...

Sana Nay Usay Bataya Kay '' Bilal Mairay Computer Mai'n Taza Tareen To Mairi Aik Hi Tasweer Hay Jo Kay Koi Khas Achi Nahi To Nahi Aai Hay... Jaisa Tum Mujhay Web Cam Pay Daikhtay Rahay Ho Wesi Woh Tasweer Nahi... Mairi Tasweer Jaisi Bhi Aai Hay Yeh Tum Rakhna Chaho To Rakh Saktay Ho ''...

Sana Nay Bila Khof.O.Khatar Bilal Kay Hawalay Apni Tasweer Kar Kay Alwidai Kalmaat Kahay Owr Silsila Munqita Kar Diya...

Mai'n Sana Ki Zaat Mai'n Poori Tarha Doob Chuki Thi...Ird Gird Say Bay Khabar Us Ki Batai'n Sunay Ja Rahi Thi Kay Achanak Silsila Munqita Ho Gaya... Mai'n Samjhi Kay Shayed Light Chali Gai Ho Gi...

Mai'n Kai Ghantay Us Ka Bay'Chaini Say Intizaar Karti Rahi Laikin Us Ko Na Aana Tha Na Woh Aai...Mai'n Computer Off Kar Kay Bister Par Gir Si Gai...

Saari Raat Sana Ka Soch Soch Kar Roti Rahi...Jibran Kay Liye Maghmoom Rahi Kay Sana Kay Inkishaaf Say Us Par Kiya Kuch Guzar Gai Ho Gi?...Us Nay Kis Tarha Yeh Sab Saha Ho Ga? Sana Ki Judai Us Say Bhi Lamha Bhar Kay Liye Sahi Na Jati Thi...Judaai Kay Baad Woh Kis Haal Mai'n Ho Ga?....Kiya Woh Sana Say Ab Nafrat Karta Ho Ga? Kiya Itni Mohabbat Karnay Wala Sana Ki In Sangeen Ghaltiyo'n Kay Ba'Wajood Sana Say Ab Nafrat Karta Ho Ga Kay Nahi...?

Mazeed Sawalaat Zehen Mai'n Jama Ho Gaey Thay Jo Ab Mai'n Sana Say Poochnay Kay Liye Bay'Chain Thi...

Aglay Din Makhsoos Time Par Mai'n Chat Room Mai'n Mowjood Thi...Maira Intizaar, Intizaar Hi Raha Laikin Sana Na Aai...Mai'n Forum Par Sana Ko PM Likhti Rahi Laikin Sana Waha'n Bhi Mowjood Na Thi...Us Nay Jo ID Diya Tha Us Par Mai'n Nay Taweel Mail Likha Jis Ka Koi Jawaab Mujhay Na Mila...

Sana Ka Intizaar Kartay Kartay Achanak Mai'n Buri Tarha Chonk Gai...Mai'n Nay Hisaab Lagaya To Mairay Pooray Wujood Mai'n Sansanahat Si Dowr Gai...Dil Zor Zor Say Dharaknay Laga...Sana Nay Mujh Say Bhi Pooray 7 Din Baat Kar Kay Raabta Munqita Kar Diya Tha...

Kiya Us Nay Mujhay Bhi 7 Din Ki Doosti Kay Liye Hi Muntakhib Kiya Tha... ?

Mujhay Ab Yaqeen Sa Ho Gaya Tha Kay Woh Mujh Say Ab Raabta Nahi Karay Gi...Is Aehsaas Nay Yak'Lakht Mujhay Kapkapa Kay Rakh Diya Kay Yeh Kiya Ho Gaya Tha?...

Mai'n Sana Kay Wujood Ki Aadi Ho Gai Thi...Us Ko Dil Say Dost Maan Chuki Thi Owr Woh Achanak Manzar Say Is Tarha Ghaeb Ho Gai Thi Jaisay Kay Kabhi Sana Ka Koi Wujood Tha Hi Nahi...

Kaash Mai'n Us Say Us Ka Phone Number Hi Lay Laiti...Maghar Mujhay Yaqeen Ho Gaya Tha Kay Woh Call Bhi Attend Na Karti...

Mai'n To Sirf Us Ki Bay Rabt Batai'n Hi Sunti Rahi Thi..Zehen Mai'n Uthnay Walay Sawaal Us Say Poochnay Ki Mairay Dil Mai'n Hasrat Hi Reh Gai...

Aik Din Mai'n Nay Jab Chat Room Mai'n Enter Hona Chaha To Woh Chat Room Us Nay Band Kar Diya Tha...Yahi Us Nay Apnay Forum Kay Saath Bhi Kiya...Jis Say Mujhay Poori Tarha Yaqeen Ho Gaya Kay Ab Sana Kabhi Koi Raabta Mujh Say Nahi Karay Gi...Raabta Munqita Us Nay Jaan Boojh Kar Kiya Tha...Kiya Woh Ab Maira Saamna Karnay Ki Khud Mai'n Himmat Na Pati Thi?...

Jis Forum Mai'n Woh Mujh Say Mili Thi Us Say Bhi Us Nay Mukammal Kinara Kashi Ikhtiyar Kar Li Thi...

Mai'n Nay Bhi Phir Woh Forum Chowr Diya Jaha'n Mairay Owr Sana Kay An'Ginat Replies Owr Yadai'n Bikhri Hui Thee'n...Mai'n Bhala Us Forum Mai'n Kis Tarha Reh Sakti Thi?...

Rabtay Ka Koi ZariyaSana Nay Mairay Liye Na Chora Tha...

Mai'n Net Ki Duniya Say Aaj Bhi Wabasta Hoo'n...Dosti Kay Kai Haath Mairi Janib Aaj Bhi Barhtay Hai'n, Laikin Phir Kabhi Mai'n Nay Kisi Say Na To Dosti Ki, Na Kabhi Kisi Chat Room Mai'n Gai...Sab Say Ghuli Mili Reh Kar Bhi Mai'n Sab Kay Liye Ajnabi Hoo'n...Net Ki Duniya Mai'n Mairay Achay Owr Mukhlis Saathi Mowjood Hai'n Laikin Net Par Maira Koi Dost Mowjood Nahi...

Sana Apnay Saath Hi Yeh Sab Bhi Lay Gai...Na Janay Kiyu'n Mairay Dil Mai'n Mohom Si Umeed Aaj Bhi Hay Kay Aik Din Sana Lowt Aaey Gi...

Mai'n Nay Jo Aakhri Mail Sana Ko Likhi Thi, Us Mai'n Us Ko Bata Diya Tha Kay Woh Mujh Say Kaha'n Raabta Kar Sakti Hay...

Sana Lowt Aaey To Mai'n Baghair Koi Shikwa Shikayat Kiye Usay Aagay Barh Kay Galay Say Laga Loo'n Gi...Us Say Kuch Bhi Na Poochoo'n Gi...Koi Sawaal Na Karoo'n Gi...

Mairay Tamaam Sawaal Ab Adhooray Hi Rahai'n Gay...

Us Ki Yeh Baat Bhi Mairay Dil.O.Dimagh Mai'n Gonjti Hay Kay
'' Mai'n Jibran Ki Hoo'n...Mai'n Ab Kabhi Kisi Ki Nahi Ban Sakti ''...

Sana Nay Jibran Say Jhoot Bol Hi Diye To Shuru Mai'n Hi Sachaai Kiyu'n Na Bata Di? Kitni Nadaan Thi...Jhoot Ka Bhala Mohabbat Say Kiya Laina Daina? Aakhir Woh Kiyu'n Sach Chupaey Rahi? Jhoot Bolnay Ka Khayaal Usay Kaisay Owr Kiyu'n Aaya, Woh Bhi Us Insaan Say Jis Ko Woh Apna Sab Kuch Jaanti Thi...Aesa Us Nay Kiyu'n Kiya?

Nikah Kay Bandhan Mai'n Bandhi Woh Jibran Ki Mohabbat Mai'n Kiyu'n Mubtila Ho Gai? Jab Kay Us Kay Ghar Walay To Jibran Kay Saath Sath Sana Ki Bhi Jaan Lay Laitay...Yeh Jaantay Huway Bhi Woh Shuru Main Hi Peechay Kiyu'n Na Hat Gai? Jibran Say Dosti Hi Kiyu'n Ki?

Zaki Owr Sana Ki Shadi Hui Kay Nahi...?

Sana Kis Haal Mai'n Hay...?

Itna Sab Kuch Bhala Us Nay Kis Tarha Ghar Walo'n Say Posheeda Rakha...?

Kiya Itnay Sagay Rishtay, Aik Hi Ghar Mai'n Rehtay Huway Is Hadd Tak Ghaflat Ka Shikar Ho Saktay Hai'n...?

Sana Nay Sab Kuch Batanay Kay Liye Maira Hi Intikhaab Kiyu'n Kiya...?

Kiya Us Nay Yeh Na Socha Kay Us Ki Aik Haftay Ki Itni Gehri Dosti Mujhay Baad Mai'n Kitna Dukh Pohnchaey Gi...?

Jibran Kis Haal Mai'n Hay? Kaha'n Hay? Kiya Un Dono'n Ka Phir Kabhi Raabta Huwa...?

Kiya Sana Waqai Qabil-e-Nafrat Hay?...

Mai'n Kal Bhi Sana Ki Khushiyo'n Kay Liye Dua Go Thi Owr Aaj Bhi Mairay Dil Say Us Kay Liye Sirf Owr Sirf Duaei'n Hi Nikalti Hai'n...In Mai'n Jibran Kay Sukoon Owr Khushiyo'n Kay Liye Bhi Duaei'n Shamil Hoti Hai'n...

Sana Kay Intizaar Ki Shayed Mujhay Aadat Si Ho Gai Hay, Yahi Lagta Hay Kay Jis Tarha Wo Achanak Manzar Say Gaeb Ho Gai, Usi Tarha Achanak Mujh Say Raabta Kar Lay Gi...

Sana Ab Lowt Aao....