[chandni kanwal]

guyz jab yahan per stories ka sama hai to maine socha mai bhi ek aadh adhori kahanii likh hi doon...........so aaj abhi aur isi waqt mai apni ek story aap k saath share kar rahi hoon hope u ppl like itwaiting 4 ur response:)




EPISODE - 1



Barish ke baad uthnay wali mehak bhi aaj mehak ke dil ko mehka na pa rahi thee .... pehlay tau ye mausam, ye mehak, ye rang ye sab us ke dil ko bohat lubhatay thay per aaj janay kion khushi uske dil se koson door thee .... "Mehak ... mehak beta .. neechay aao mehman anay waley hain" ... uski ammi ki awaz uski sama'at se takrai ... bojhal dil ke sath usne akhri nigah khirki per dali aur ...........

aur apni soochon ke mehlon se nikal kar wo neeche chali gai.. 'Jee ami.. aapne bulaya..? 'Kitni deer se awaz de rahi hoon.. kahan ghum thi.. kitchen main jao aur neelam se kaho ke wo change kar le.. aur tum kitchen sanbhaal lo..'Jee acha ami kehte hue wo kitchen ki taraf barhi..

bojhal dil aur masnui muskurahat ke sath halkay halkay qadam berhatay hoay bhi faraz ka chehra uski nigahon ke samnay baar baar maazi ki yaadon ka anbaar liay ussay terpa raha tha .... "Baji main ker leti hoon ye ... aap tyaar ho jayen" ... "han theek hai ... dekho ye kabab zada fry mat ker dena ... tumhain pata hai na ke shahid ko light-fried pasand hain ... aur biryani ko dam laga dia hai maine, usko dekh lena ... " ... "ji baaji, main sab dekh loon gi" ... wo muskurai , per faraz ke chehra phir se achanak uske samnay lehra sa gaya aur muskrahat achanack ghaib ho gai ...... achanak se usne apnay aap ko sambhala per neelam apnay kamray mein ja chuki thee ....

Shahid apne parents ke saath betha Neelam ko baar baar deekh raha tha. Neelam chaye piyali main daal rahi thi aur Shahid ki nazron ko achi tarhan samajh rahi thi. Chaye de kar wo kitchen main agai jahan Mehak uska intezaar kar rahi thi. 'Baji, itni surkhi apke chehre par. Kiya raaz hai?' 'Kia fazool baten kar rahi hoo, Mehek?' Ye keh neelam aur mehak dono hans deen.
Shahid neelam ki khala ka beta tha. Wo in ke sheher job ki talash mein aya hua tha..

Daraz qad, kushada peshani aur mardana wajahat , neelam bhi tau dil mein mukammal tor se basa chuki thee Shahid ko ... ikathay khailta bachpan kaisay pankh laga ker urta chala gaya pata bhi nahin chala .... bachpan mein jab khailtay hoay Shahid ko halki si moch bhi aa jati thee tau kaisay tarap jaati thee wo ... Shahid bhi tau humaisha khiyal kerta tha na uska .... koi bhi khanay ki cheez hoti, pehlay neelam ko chakhata phir khud khata tha .... bohat achay dost thay dono .... kab ye dosti pyaar mein badli pata bhi tau na chala ... per kaisa pyaar tha ye jiss mein koi izhar nahin tha .... bas eik khamosh mohabbat thee jo dilon mein diay jalae hoay thee .... kaisay chup ke roi thee wo jab khala loag ghar shift ker ke lahore chalay gaye thay .... pooray 7 saal ho gaye thay iss baat ko ... aur ab eik baar phir, wo diyay jo kissi zamanay mein jalay thay phir se bharaknay lagay thay .... aag jab thandi honay wali ho aur koi jhonka aye tau wo pehlay se bhi tez ho jati hai .... yahi haal Neelam aur shahid ke dilon ka tha.. aag bharak chuki thee.. intezar mushkil aur izhar naguzeer tha !!


Shahid ke ghar wale tareekh pakki kar ke wapis Lahore chale gaye. Neelam apne finals ke exams main busy hogai aur Shahid job ki talash main magan hogaya... Sab apne kamon main lag gaye siwaye Mehak ke.. Faraz, jise usne dil-o-jaan se chaaha tha .. Jiske saath usne zindagi ka har ane wala lamha beetane ke khuwaab dekhe the.. Jiski mojoodgi main wo duniya to kia apna aap kho beeth'ti thi.. abh wo Faraz..uska Faraz na raha tha .... !!

[chandni kanwal]

to be continued!!

[Adi_pk]

Awesome Writing Skills !!! very good.. keep it up !!

[HULK]

wah mooonlight, i didnt know u could write coherently
nice job, looking forward for the remainder of Mehal

[Style Mantra]

wowwwww fabulous...u'll b a great writer 1 day insha'Allah...

[chandni kanwal]

Originally Posted by Adi_pk

Awesome Writing Skills !!! very good.. keep it up !!

thanks 4 appreciating

[chandni kanwal]

Originally Posted by HULK

wah mooonlight, i didnt know u could write coherently
nice job, looking forward for the remainder of Mehal

thankuuu shoo much yarr..really ek choti si koshish thi busss

[chandni kanwal]

Originally Posted by §t¥l€ Mنnt®a

wowwwww fabulous...u'll b a great writer 1 day insha'Allah...

thanks 4 liking .......INSHALLAH wo kiya kehtey hai u k moo mai ghee+shakar........llolz

[chandni kanwal]

Episode - 2


Sunbal ko jitni khushi in 2 maheeno main mili, wo use pehle kabhi na mili thi. Ghar main uske kiya kami thi. Sheheryaar Ahmed, mulk ke top barrister, ki iklouti beti ke paas wo sab kuch tha jis se ek insaan ki zindagi kafi had tak, balke bilkul asaan ban sakti hai. Magar duniyawi cheezon ki use kooi parwah nahi thi. Sakoon, khushi, chain, tawajo .. yehi wo chahti thi.. Magar uski maa'n ki death ke baad uske papa work ke gulaam ban gaye.. Aur wo bu'a ke saath din guzarti..

Eid mein teen hi din baqi reh gaye thay .. Neelam ke liay tau ye eid, eik aam eid nahin thee .. eid ke din uski aur Shahid ki mangni ki tareekh bhi thee ... iss hawalay se ghar mein tyyariyan khoob zoro shor se chal rahi theen .. kapron ki designing se le ke jewellary ki khareedari tak, sab kuch Mehak ki nigrani mein ho raha tha ... jab ke Neelam ki ammi mehmano ki amad aur un ki khatir tawazah mein lagi hoi theen ... Mehak barh charh ker her kaam ker rahi thee aur apni ammi ka khoob hath bata rahi thee, jabkay Neelam khud bhi ghar ke kaamo mein masroof thee ... khushi us ke ang ang se mehsoos hoti thee ... jo bhi dekhta dil hi dil mein muskuraye bina nahin reh sakta tha ... Aaj bhi Mehak zewarat ka set lenay Neelam ke sath Imperial Market ja rahi thee ... taxi mein beth ker we loag National Jewellers ke ki shop mein dakhil hoay .. wahan pe kuch sets dekhnay ke baad unhain eik set pasand aya per wo pehlay se reserved tha ... 'kiss ne reserve kerwaya hai ye .. please aap humain un ka contact number de dijiay ', Mehak ne poocha .. 'Ma'am wesay tau humari policy mein nahin hai ye information dena .. per chunkay aap humari purani customer hain tau aap ko dekh ke bata deta hoon ........ ji madam, ye koi Faraz Kiyani sahab hain .. unhon ne Miss Sunbal ke liay reserve karaya hai' ... Dunya achanak se ghoom si gai ... channakay ki eik tez awaz ke sath Mehak ke hath se glass gir ker toot gaya ... ye awaz sab ne suni ... per eik awaz thee jo sirf Mehak ko sunai di ... us ke dil tootnay ki channakkay daar awaz !!

'Set kahan hai, Mehek?' Uski ammi us se teen baar pooch chuk'in th'in.. magar Mehek ko to kuch sunai hi nahi de raha tha.. 'ye kooi Faraz Kiyani sahab hain.. unhon ne Miss Sunbal ke liye reserve karaya hai' In lafzon ne mehek ko mazbooti se jakar rakha tha.. aur wo bhi is qaid se bahir ane ki koshish nahi kar rahi thi.. Beetey lamhen uske saamne naachney lage aur wo unke raks main madhoosh hogai.. 'Mehek!' Harbara kar wo apne idher udher dekhne lagi.. 'Tumhari tabiyat to theek hai?'
'Jee ami thora headache hai..'
'Aur jewellery kahan hai?'
'Ami woh.. woh main..ankhon ke band ab uska mazeed sath nahin de saktay thay ... band toot gaye ... sailaab aa gaya ... ansoo'on ka sailaab ... 'Mehak .. meri jaan meri bacchi' ... ammi ne mehak ko seenay se laga lia aur apni ankhon ke band bhi khol diay !!

Sham ko Mehak khud ko halka phulka mehsoos ker rahi thee ... dopehar ko achi tarah se ro ker us ke dil ka ghubar nikal gaya tha ... chae peetay hoay us nay soch lia tha ke ab wo mazeed ansoo nahin bahaye gi .... 'kion bahao'n mein ansoo .... kion ... wo bhi us shakhs ke liay jiss ne meray pyaar ki qadar bhi nahin .... bewafai ki meray sath .... beech manjhdar mein akaila chor ke chala gaya ... kion rakhon mein dil mein usko aur uski yaadon ko ... mujhey us ke hisaar se bahar nikal ana chahyay ab ... aur main zarur nikal aon gi .... usko dikha doon gi ke main us ke baghair bhi zinda reh sakti hoon .... ' ... ye soch ker usko kafi sakoon mila .. Eid mein sirf 3 din reh gaye thay aur bohat sa kaam para tha .... chae ka cup rekh ker wo Neelam ke room ki taraf berhi ke achanak se fone ki ghanti baji ..................................................

[chandni kanwal]

Sunbal aur Faraz??

Mehek ke saah kia hua??

Faraaz ne use dhooka kiun dia?

Ye dhooka hi tha ya kuch aur??

For all that and much more ... keep reading .... i will be back very shortly

To Be Continued!!

[HULK]

wah chandni, guriya mazak ke ilawa:) aap acha likhti hain:)
keep on doing the good work:)

[~JazzY~]

Aly wah :) ... yeh to bhot achi stoly hai :)

[fairnas]

very nice chandni

mashALLAh se forumpk per bohat acchy acchy writer ho gay hein

[chandni kanwal]

Originally Posted by HULK

wah chandni, guriya mazak ke ilawa:) aap acha likhti hain:)
keep on doing the good work:)

thankuuuuuuu muj bhot acha laga.....thanks 4 appreciation

[chandni kanwal]

Originally Posted by ~JazzY~

Aly wah :) ... yeh to bhot achi stoly hai :)

thanks aagay ki parhna aur bhi achi hai:)

[chandni kanwal]

Originally Posted by fairnas

very nice chandni

mashALLAh se forumpk per bohat acchy acchy writer ho gay hein

thank u shoo much.........bus g tabhi to pakistan mai bhot talent hai

[chandni kanwal]

EPISODE 3

Hello..' doosri taraf se awaaz ai.. Ye awaaz uske liye anjaan na thi, magar uske dimaagh ne uske dil ki baat ko nazaar andaaz karte hue phone receiver par rakhwa dia.
'Kon tha Mehak?'
'Koi nahi ammi....... ... koi wrong number..' Mehak ne sargoshi si ki ...

Har kisi ki nazar Neelam aur Shahid par thi. Neelam ne feerozi rang ka lehnga pehna hua tha jo us par bohat jach raha tha. Shahid ka three peace suit bhi us lehngey se match kar raha tha. Angoothi pehnane ki rasm ke baad sabne jori ke saath tasweerain banwayen. Mehak bhi kafi khush nazar arahi thi. Isi lamhey ke liye usne akhirkaar apni khushi jo qurbaan kar di thi.

Eid aur sath mein Neelam ki mangni ki rasm dono hi bohat achay rahey .. poora din ghar mein mehmano ki amad aur chehal pehal rahi .. raat ko eik pur-takkalluf dawat ka bhi intezaam tha jiss ki ziada tar zimmadari Mehak ne le rakhi thee. Sarey eham pakwan Mehak ne khud banaye thay . Khaana itna lazeez tha ke sab hi loag ungliyan chat-tay reh gaye. Unhi logon mein Shahid ka bohat qareebi dost Jawad bhi tha. ****umi rang, daraz qad, qareenay se banay hoay baal aur chehray per eik khoobsoorat si masoomana muskurahat .. jab bhi kissi se baat kerta aisay ghul mul ker bohat hi dostana andaz mein kerta ke kuch hi der mein sari ajnabiyat ghayeb ho jati .. poori mehfil ki jaan ban jata .. aaj bhi wo sab se aisay hi batain ker raha tha ... sath hi us ki tez nazron ne ye bhi mehsoos ker lia tha ke uski bhabi (yani Neelam) ki behan kuch door door si reh rahi hai sab cheezon se .. Neeli ankhon wali ye sanwali si larki uski gardashi nigahon ka markaz si ban gai thee .....


'Shahid, wo neeli ankhon wali khamosh si larki kon thi?' anjaan bante hue Jawad ne wapsee pe Shahid se poocha. 'Neelam ki behen hai, kiun..? Aajh pehli baar kisi larki ke bare main pooch raha hai.. kheriat hai na?' Shahid ne chertey hue poocha aur Jawad 'kuh nahin yaar' keh ker muskuratay hoay chup hogaya.

'Amir bhai, aapko car tou nahi chahiye na aajh? Kiunke mujhe abhi bahar kuch kaam hai'
'Nahin ... aaj main ghar par hi hoon.' Ye keh kar Amir apne kamre ki taraf barh diya. Sunbal ne aajh Faraz ko lunch par invite kiya hua tha. Menu dekhte wakt Faraz ka mood kuch bujha bujha sa tha.
'Kiya hua Faraz? Tabiyat to theek hai?'
'Han, bas kuch thakan si hai', Faraz ne sarsari tor par kaha.


Neelay asmaan per chaaye hoay ghannay sufaid badal, halki halki si boonda baandi aur sath mein ahista se chalti hoi thandi hawa, Faraz tau deewana tha aisay mausam ka per aaj ye mausam bhi uske bujhay hoay dil ko garma nahin pa raha tha. Sunbal ne khanay ke doran bhi kai baar Faraz se poochnay ki koshish ki per her baar wo taal gaya. Akhir wo usko batata bhi kia .. ye ke zahiri tor per tau wo abhi us ke paas betha hai magar uska dil tau yahan se kahin door kissi aur jagah pe hai ... batain tau wo us say ker raha hai per dehan uska kissi aur jagah hai .. wo tau shaid bata bhi deta per chupana uski majboori thee ... kuch saal pehlay bilkul issi tarah ke mausam mein kissi se kiya hoa wo wada hi tau tha jiss ne usko be bas ker rakha tha ... kaisa wada tha wo jiss ne uski khushiyan hi cheen leen theen us say ... sab kuch hi tau khatam ho gaya tha us waday ke sath ... kaisa wada tha jiss ko chahtay hoay bhi wo tor nahin sakta tha ... waday ki paasdaari uska muqaddar thee aur ye weeran zindagi uska naseeb .. us nay bas apnay aap ko halaat aur waqt ke dharay per chor dia tha ... eik aisay tinkay ki tarah jo pani ke bahaao ke sath behta chala jata hai!!

[chandni kanwal]

to be countinued

[HULK]

Originally Posted by chandni kanwal

thankuuuuuuu muj bhot acha laga.....thanks 4 appreciation

u r most welcome:)
keep up the good work:)

[chandni kanwal]

Originally Posted by HULK

u r most welcome:)
keep up the good work:)

BUS J.....aap ki dua chahiye