[Style Mantra]

Here's my collection of my favourite poet Mirza Asadullah Khan Ghalib

[Style Mantra]

aah ko chaahiye ik umr asar hone tak
kaun jiitaa hai terii zulf ke sar hone tak


daam har mauj me.n hai halqaa-e-sad_kaam-e-nahang
dekhe.n kyaa guzare hai qatare pe gauhar hone tak

[daam = net/trap; mauj = wave; halqaa = ring/circle]
[sad = hundred; nahang = crocodile; gauhar = pearl]


aashiqii sabr-talab aur tamannaa betaab
dil kaa kyaa rang karuu.N Khuun-e-jigar hone tak

[sabr-talab=patient]


ham ne maanaa ke taGaaful na karoge lekin
Khaak ho jaaye.nge ham tum ko Khabar hone tak

[taGaaful=neglect/ignore]


partav-e-Khuur se hai shabanam ko fanaa kii taaliim
mai.n bhii huu.N ek inaayat kii nazar hone tak

[partav-e-Khuur = sun's rays; shabanam=dew]
[fanaa = perish; inaayat = favour]


yak_nazar besh nahii.n fursat-e-hastii Gaafil
garmii-e-bazm hai ik raqs-e-sharar hone tak

[besh = excess; Gaafil = ignorant]
[raqs = dance; sharar = flash/fire]


Gam-e-hastii kaa 'Asad' kis se ho juz marg ilaaj
shammaa har rang me.n jalatii hai sahar hone tak

[Style Mantra]

baaziichaa-e-atfaal hai duniyaa mere aage
hotaa hai shab-o-roz tamaashaa mere aage

[baaziichaa-e-atfaal = child's play]

ik khel hai aurang-e-sulemaa.N mere nazadiik
ik baat hai ejaaz-e-masiihaa mere aage

[aurang = throne; ejaaz = miracle]

juz naam nahii.n suurat-e-aalam mujhe manzuur
juz vaham nahii.n hastii-e-ashiyaa mere aage

[juz = other than; aalam = world; ashiyaa = things]

hotaa hai nihaa.N gard me.n seharaa mere hote
ghisataa hai jabii.n Khaak pe dariyaa mere aage

[nihaa.N = hidden; gard = dust]
[seharaa = desert, jabii.n = forehead]

mat puuchh ke kyaa haal hai meraa tere piichhe
tuu dekh ke kyaa rang hai teraa mere aage

sach kahate ho Khud_biin-o-Khud_aaraa huu.N na kyo.N huu.N
baiThaa hai but-e-aa_iinaa siimaa mere aage

[Khud_biin = proud/arrogant, Khud_aaraa = self adorer]
[but-e-aa_iinaa = lover's mirror; siimaa = particularly]

phir dekhiye andaaz-e-gul_afshaanii-e-guftaar
rakh de ko_ii paimaanaa-e-sahabaa mere aage

[gul_afshaanii-e-guftaar = to scatter flowers while speaking]
[sahaba = wine]

nafrat ka gumaa.N guzare hai mai.n rashk se guzaraa
kyo.N kar kahuu.N lo naam naa us kaa mere aage

[gumaaN = suspicion/doubt; rashk = envy]

imaa.N mujhe roke hai jo khii.nche hai mujhe kufr
kaabaa mere piichhe hai kaliisaa mere aage

[kufr = impiety, kaliisaa = church/cathedral]

aashiq huu.N pe maashuuq_farebii hai mera kaam
majanuu.N ko buraa kahatii hai lailaa mere aage

Khush hote hai.n par vasl me.n yuu.N mar nahii.n jaate
aa_ii shab-e-hijaraa.N kii tamannaa mere aage

[hijr = separation]

hai mauj_zan ik qulzum-e-Khuu.N kaash! yahii ho
aataa hai abhii dekhiye kyaa-kyaa mere aage

[mauj_zan = turbulent (as in waves)]
[qulzum = sea, Khuu.N = blood]

go haath ko jumbish nahii.n aa.Nkho.n me.n to dam hai
rahane do abhii saaGar-o-miinaa mere aage

[jumbish = movement; saaGar-o-miinaa = glass of wine]

ham_peshaa-o-ham_masharab-o-ham_raaz hai meraa
'Ghalib' ko buraa kyo.N kaho achchhaa mere aage

[ham_peshaa = of the same profession]
[ham_masharab = of the same habits(i.e. a fellov drinker)]
[ham_raaz = confidante]

[Style Mantra]

bas ki dushwaar hai har kaam ka aasaa.N honaaa
aadamii ko bhii mayassar nahii.n insaa.N honaa

[dushwaar=difficult; mayassar=possible]

giriyaa chaahe hai Kharaabii mere kaashaane kii
dar-o-diivaar se Tapake hai bayaabaa.N honaa

[giriyaa=wiiping; kaashaanaa=small house; bayaabaa.N=wilderness]

waa-e-diiwaangii-e-shauq ke har dam mujh ko
aap jaanaa udhar aur aap hii hairaa.N honaa

jalvaa az_bas ke taqaaza-e-nigah karataa hai
jauhar-e-aaiina bhii chaahe hai mizaGaa.N honaa

[az_bas=intensely; jauhar=skill/knowledge, mizaGaa.N=eyelid]

ishrat-e-qatl_gah-e-ahal-e-tamannaa mat puuchh
iid-e-nazzaaraa hai shamashiir kaa uriyaa.N honaa

[ishrat=joy/delight, shamashiir=sword, uriyaa.N=naked/bare]

le gaye Khaak me.n ham daaG-e-tamannaa-e-nishaat
tuu ho aur aap ba_sad_rang-e-gulistaa. N honaa

[nishaat (or nashaat)=enthusiasm/happiness, sad_rang=hundred colours]

ishrat-e-paaraa-e-dil, zaKhm-e-tamannaa_Khaanaa
lazzat-e-riish-e-jigar Garq-e-namakdaa.N honaa

[ishrat=joy/delight; paaraa=fragment/piecek lazzat=taste]
[riish=wound; Garq=drown/sink; namakdaa.N=container to keep salt]

kii mere qatl ke baad us ne jafaa se taubaa
haaye us zod_pashemaa.N kaa pashemaa.N honaa

[zod=quickly; pashemaa.N=ashamed/embarrassed]

haif us chaar girah kapa.De kii qismat 'Ghalib'
jis kii qismat me.n ho aashiq kaa garebaa.N honaa

[haif=alas!; girah=one sixteenth of a yard; garebaa.N=collar]

[Style Mantra]

dil-e-naadaa.N tujhe huaa kyaa hai
aaKhir is dard kii davaa kyaa hai

ham hai.n mushtaaq aur vo bezaar
yaa ilaahii ye maajaraa kyaa hai

[mushtaaq=interested; bezaar=displeased/sick of]

mai.n bhii muu.Nh me.n zabaan rakhataa huu.N
kaash puuchho ki muddaa kyaa hai

jab ki tujh bin nahii.n koii maujuud
phir ye ha.ngaamaa, ai Khudaa kyaa hai

qataah:

ye parii cheharaa log kaise hai.n
Gamazaa-o-ishvaa-o-adaa kyaa hai

shikan-e-zulf-e-ambarii kyo.n hai
nigah-e-chashm-e-surmaa saa kyaa hai

[shikan=wrinkle, ambarii=fragrance]

sabazaa-o-gul kahaa.N se aaye hai.n
abr kyaa chiiz hai havaa kyaa hai

hamako unase vafaa kii hai ummiid
jo nahii.n jaanate vafaa kyaa hai

haa.N bhalaa kar teraa bhalaa hogaa
aur darvesh kii sadaa kyaa hai

[darvesh=medicant; sadaa=voice]

jaan tum par nisaar karataa huu.N
mai.n nahii.n jaanataa duaa kyaa hai

mai.n ne maanaa ki kuchh nahii.n 'Ghalib'
muft haath aaye to buraa kyaa hai

[Style Mantra]

dil hii to hai na sang-o-Khisht dard se bhar na aaye kyuu.N
roe.nge ham hazaar baar koii hame.n sataaye kyuu.N

[sang=stone, Khisht=brick]

dair nahii.n haram nahii.n dar nahii.n aastaa.N nahii.n
baiThe hai.n rahaguzar pe ham Gair hame.n uThaaye kyuu.N

[dair=temple, haram=mosque, dar=gate, aastaa.N=doorstep]

jab vo jamaal-e-dilafaroz, suurat-e-mahr-e-niimaroz
aap hii ho nazaaraasoz, parde me.n muu.Nh chhupaaye kyuu.N

[jamaal-e-dilafaroz=face whose beauty lights up the heart; mahr-e-niimaroz=midday sun]
[nazaaaraasoz=sight which sears/burns]

dashnaa-e-Gamzaa jaa.Nsitaa.N, naavak-e-naaz bepanaah
teraa hii aks-e-ruKh sahii, saamane tere aaye kyuu.N

[dashnaa=dagger; Gamzaa=amorous glance; jaa.Nsitaa.N=fatal/jaan lene vaalaa;]
[naavak=arrow; naavak-e-naaz=arrow of pride; aks=image ]

qaid-e-hayaat-o-band-e-Gam asl me.n dono.n ek hai.n
maut se pahale aadamii Gam se najaat paaye kyuu.N

[qaid-e-hayaat=prison of life; band-e-Gam=bindings/chains of sorrow; najaat=freedom/liberation]

husn aur us pe husn-e-zan rah gaii bulahavas kii sharm
apane pe etimaad hai Gair ko aazamaaye kyuu.N

[husn-e-zan=agreement; bulahavas=excessive desires; etimaad=trust]

vaa.N vo Guroor-e-izz-o-naaz yaa.N ye hijaab-e-paas vaz_a
raah me.n ham mile.n kahaa.N, bazm me.n vo bulaaye.n kyuu.N

[Guroor-e-izz-o-naaz=pride of modesty; hijaab-e-paas vaz_a=shy respect]

haa.N vo nahii.n Khudaaparast, jaao vo bevafaa sahii
jisako ho diin-o-dil aziiz, usakii galii me.n jaaye kyuu.N

[Khudaaparast=follower of Khuda=Muslim; diin-o-dil =religion/faith and heart; aziiz=dear]

"Ghalib"-e-Khastaa ke baGair kaun se kaam band hai.n
roiie zaar-zaar kyaa, kiijie haaye-haaye kyuu.N

[Khastaa=wretched/durdashaa-grast; zaar-zaar=bitterly/phuuT-phuuT kar]

[Style Mantra]

dost Gam_Khvaarii me.n merii sa_ii farmaaye.nge kyaa
zaKhm ke bharane talak naaKhun na ba.Dh jaaye.nge kyaa

beniyaazii had se guzarii bandaa paravar kab talak
ham kahe.nge haal-e-dil aur aap farmaaye.nge kyaa

hazarat-e-naaseh gar aaye.n diidaa-o-dil farsh-e-raah
ko_ii mujh ko ye to samajhaa do ki samajhaaye.nge kyaa

aaj vaa.N teG-o-kafan baa.Ndhe hue jaataa huu.N mai.n
uzr meraa qatl karane me.n vo ab laaye.nge kyaa

gar kiyaa naaseh ne ham ko qaid achchhaa yo.n sahii
ye junuun-e-ishq ke andaaz chhuT jaaye.nge kyaa

Khaanaa zaad-e-zulf hai.n zanjiir se bhaage.nge kyaa
hai.n giraftaar-e-vafaa zindaa.N se ghabaraaye.nge kyaa

hai ab is maamuure me.n qahat-e-Gam-e-ulfat asad
ham ne ye maanaa ki dillii me.n rahe khaaye.nge kyaa

[Style Mantra]

ek ek qatare kaa mujhe denaa pa.Daa hisaab
Khuun-e-jigar vadii_at-e-mishagaan-e-yaar thaa

ab mai.n huu.N aur maatam-e-yak shahar-e-aarazuu
to.Daa jo tuu ne aa_iinaa timasaal daar thaa

galiyo.n me.n merii naash ko khe.nche phiro ki mai.n
jaa.N daad-e-havaa-e-sar-e-rahaguzaar thaa

mauj-e-saraab-e-dasht-e-vafaa kaa na puchh haal
har zarraa misl-e-jauhar-e-teG aabadaar thaa

kam jaanate the ham bhii Gam-e-ishq ko par ab
dekhaa to kam hue pa Gam-e-rozagaar thaa

[Style Mantra]

ghar hamaaraa, jo na rote bhii, to viraa.N hotaa
bahr gar bahr na hotaato bayaabaa.N hotaa

ta.ngi-e-dil kaa gilaa kyaa, ye wo kaafir dil hai
ke agar ta.ng na hotaa, to pareshaa.N hotaa

baad-e-yak umr-e-waraa, baar to detaa baare
kaash rizawaa.N hii dar-e-yaar kaa darabaa.N hotaa

[Style Mantra]

hazaaro.n Khvaahishe.n aisii ki har Khvaaish pe dam nikale
bahut nikale mere armaa.N lekin phir bhii kam nikale

Dare kyuu.N meraa qaatil kyaa rahegaa usakii gardan par
vo Khuu.N jo chashm-e-tar se umr bhar yuu.N dam-ba-dam nikale

[chashm=eye; tar=wet; dam_ba_dam=continously]

nikalanaa Khuld se aadam kaa sunate aaye hai.n lekin
bahut be-aabaruu hokar tere kuuche se ham nikale

[Khuld=Paradise; be-aabaruu=disgrace; kuuchaa=street]

bharam khul jaaye zaalim tere qaamat kii daraazii kaa
agar is turraa-e-purapech-o-Kham kaa pech-o-Kham nikale

[qaamat=stature; daraazii=length/delay; turra=ornamental tassel worn in the turban]
[pech-o-Kham=curls in the hair]

magar likhavaaye koii usako Khat to hamase likhavaaye
huii subah aur ghar se kaan par rakkhar qalam nikale

huii is daur me.n ma.nsuub mujhase baadaa-ashaamii
phir aayaa vo zamaanaa jo jahaa.N se jaam-e-jam nikale

[ma.nsuub=association, baada_aashaamee=havign to do with drinks]

huii jinase tavaqqo Khastagii kii daad paane kii
vo hamase bhii ziyaadaa Khastaa-e-teG-e-sitam nikale

[tavaqqo=expectation; Khastagii=injury, daad=justice]
[Khasta=broken/sick/injured, teG=sword, sitam=cruelity ]

muhabbat me.n nahii.n hai farq jiine aur marane kaa
usii ko dekh kar jiite hai.n jis kaafir pe dam nikale

zara kar jor siine par ki tiir-e-pursitam nikale
jo vo nikle to dil nikale jo dil nikale to dam nikale

Khudaa ke vaaste pardaa na kaabe se uThaa zaalim
Kahii.n aisaa na ho yaa.N bhii vahii kaafir sanam nikale

Kahaa.N maiKhaane ka daravaazaa 'Ghalib' aur kahaa.N vaaiz
par itanaa jaanate hai.n kal vo jaataa thaa ke ham nikale

[vaaiz=preacher]

[Style Mantra]

har ek baat pe kahate ho tum ki tuu kyaa hai
tumhii.n kaho ke ye a.ndaaz-e-guftaguu kyaa hai

na shole me.n ye karishmaa na barq me.n ye adaa
koii bataao ki vo shoKh-e-tu.ndaKhuu kyaa hai

ye rashk hai ki vo hotaa hai hamasuKhan hamase
vagarnaa Khauf-e-badaamozii-e-ad kyaa hai

[rashk=jealousy; hamasuKhan=some who agrees with you]
[Khauf=fear; aamozii=teaching; aduu=enemy]

chipak rahaa hai badan par lahuu se pairaahan
hamaarii jeb ko an haajat-e-rafuu kyaa hai

[pairaahan=dress/cloth/robe; haajat=need; rafuu=darning]

jalaa hia jism jahaa.N dil bhii jal gayaa hogaa
kuredate ho jo ab raakh justajuu kyaa hai

rago.n me.n dau.Date phirane ke ham nahii.n qaayal
jab aa.Nkh hii se na Tapakaa to phir lahuu kyaa hai

vo chiiz jisake liye hamako ho bahisht aziiz
sivaa_e baadaa-e-gulfaam-e-mushkabuu kyaa hai

[bahisht=heaven; baadaa=wine; gulfaam=delicate/like a flower]
[mushkabuu=the smell of musk]

piyuu.N sharaab agar Khum bhii dekh luu.N do chaar
ye shiishaa-o-qadaah-o-kuuzaa-o-subuu kyaa hai

[Khum=wine barrel, qadaah=goblet, subuu=wine pitcher ]

rahii na taaqat-e-guftaar aur agar ho bhii
to kis ummiid pe kahiye ke aarazuu kyaa hai

[guftaar=speech]

banaa hai shaah kaa musaahib, phire hai itaraataa
vagarnaa shahar me.n "Ghalib" kii aabaruu kyaa hai

[musaahib=associate]

[Style Mantra]

ibn-e-mariyam huaa kare koii
mere dukh kii davaa kare koii

[ibn=son; mariyam=The Virgin Mary]

shuraa-o-aa_iin par madaar sahii
aise qaatil kaa kyaa kare koii

[shuraa=the Islamic divine code of life; aa_iin=law]
[madaar=circumference / place of turning ]

chaal jaise ka.Dii kamaa.N kaa tiir
dil me.n aise ke jaa kare koii

[jaa=space ]

baat par vaa.N zubaan kaTatii hai
vo kahe.n aur sunaa kare koii

bak rahaa huu.N junuu.N me.n kyaa kyaa kuchh
kuchh na samajhe Khudaa kare koii

[junuu.N=ecstasy]

na suno gar buraa kahe koii
na kaho gar buraa kare koii

rok lo gar Galat chale koii
baKhsh do gar Khata kare koii

[baKhsh=pardon, Khata=mistake]

kaun hai jo nahii.n hai haajatama.nd
kisakii haajat ravaa kare koii

[haajatama.nd=person in need; haajat=need; ravaa=fulfill]

kyaa kiyaa Khijr ne sika.ndar se
ab kise rahanumaa kare koii

jab tavaqqo hii uTh gayii "Ghalib"
kyo.n kisii kaa gilaa kare koii

[tavaqqo=expectations; gilaa=complaint]

[Style Mantra]

ishq mujhako nahii.n vahashat hii sahii
merii vahashat terii shoharat hii sahii

[vahashat=solitude; shoharat=fame]

qataa kiije na ta'alluq ham se
kuchh nahii.n hai to adaavat hii sahii

[qataa=to break; ta'alluq=relation; adaavat=animosity]

mere hone me.n hai kyaa rusvaa_ii
ye vo majalis nahii.n Khalvat hii sahii

[majalis=assembly; Khalvat=isolation]

ham bhii dushman to nahii.n hai.n apane
Gair ko tujh se mohabbat hii sahii

apanii hastii hii se ho jo kuchh ho
aagahii gar nahii.n Gafalat hii sahii

[hastii=existence; aagahii=fore knowledge; Gafalat=negligence]

umr har cha.nd ke hai barq-e-Khiraam
dil ke Khuu.N karane kii fursat hii sahii

[barq=lightning; Khiraam=manner of walking]

ham koii tarq-e-vafaa karate hai.n
na sahii ishq musiibat hii sahii

[tarq=relinquishment]

kuchh to de ai falak-e-na_i.nsaaf
aah-o-fariyaad kii ruKhasat hii sahii

[falak=sky]

ham bhii tasliim kii Khuu Daale.nge
beniyaazii terii aadat hii sahii

[tasliim=greeting/salution; Khuu=habit; beniyaazii=independence]

yaar se chhe.Daa chalii jaaye "Asad"
gar nahii.n vasl to hasarat hii sahii

[vasl=meeting; hasarat=desire ]

[Style Mantra]

koii din gar zi.ndaganii aur hai
apane jii me.n hamane Thaanii aur hai

aatish-e-dozaKh me.n ye garmii kahaa.N
soz-e-Gam hai nihaanii aur hai

[dozaKh=hell; soz=passion/heat; nihaanii=hidden ]

baarahaa dekhii.n hai.n unakii ra.njishe.n
par kuchh ab ke sar_giraanii aur hai

[sar_giraanii=pride]

deke Khat muu.Nh dekhataa hai naamaabar
kuchh to paiGaam-e-zabaanii aur hai

[naamaabar=messenger]

qaataa-e-amaar hai aksar nujuum
vo balaa-e-aasamaanii aur hai

[qaata-e-amaar=killers; nujuum=stars; balaa-e-aasamaanii=catastrophe]

ho chukii.n "Ghalib" balaaye.n sab tamaam
ek marg-e-naagahaanii aur hai

[balaaye.n=calamity; marg=death; naagahaanii=sudden/accidental]

[Style Mantra]

koii ummiid bar nahii.n aatii
koii suurat nazar nahii.n aatii

maut kaa ek din mu'ayyaa.N hai
nii.nd kyo.n raat bhar nahii.n aatii

[mu'ayyaa.N=definite]

aage aatii thii haal-e-dil pe ha.Nsii
ab kisii baat par nahii.n aatii

jaanataa huu.N savaab-e-taa'at-o-zahad
par tabiiyat idhar nahii.n aatii

[savaab=reward of good deeds in next life, taa'at=devotion, zahad=religious deeds]

hai kuchh aisii hii baat jo chup huu.N
varna kyaa baat kar nahii.n aatii

kyo.n na chiiKhuu.N ki yaad karate hai.n
merii aavaaz gar nahii.n aatii

daaG-e-dilagarnazar nahii.n aata
buu bhii ai chaaraagar nahii.n aatii

[chaaraagar=healer/doctor ]

ham vahaa.N hai.n jahaa.N se ham ko bhii
kuchh hamaarii Khabar nahii.n aatii

marate hai.n aarazuu me.n marane kii
maut aatii hai par nahii.n aatii

kaabaa kis muu.Nh se jaaoge 'Ghalib'
sharm tumako magar nahii.naatii

[Style Mantra]

laazim thaa ki dekho meraa rastaa koii din aur
tanhaa gaye kyo.n ab raho tanhaa koii din aur

[laazim=necessary, tanhaa=alone ]

miT jaayegaa sar, gar teraa paththar na ghisegaa
huu.N dar pe tere naasiyaa_farsaa koii din aur

[naasiyaa=forehead, farsaa=to kneel down and touch the forehead to the ground]

aaye ho kal aur aaj hii kahate ho ki jaauu.N
maanaa ki hameshaa nahii.n achchaa koii din aur

jaate hue kahate ho qayaamat ko mile.nge
kyaa Khuub! qayaamat kaa hai goyaa koii din aur

haa.N ae falak-e-piir, javaa.N thaa abhii aarif
kyaa teraa biga.Dataa jo na marataa koii din aur

[falak-e-piir=referring to God]

tum maah-e-shab-e-char_duhum the mere ghar ke
phir kyo.n na rahaa ghar kaa vo naqshaa koii din aur

[maah-e-shab-e-char_duhum=moon of the fourteenth night]

tum kaun se aise the khare daad-o-sitad ke
karataa malak_ul_maut taqaazaa koii din aur

[daad=justice, sitad=to take; malak_ul_maut=angel of death]

mujhase tumhe.n nafrat sahii, nayyar se la.Daaii
bachho.n kaa bhii dekhaa na tamaashaa koii din aur

guzarii na bahar_haal yaa muddat Khushii-naaKhush
karanaa thaa javaa.N_marg! guzaaraa koii din aur

[javaa.N_marg=one who dies young]

naadaa.N ho jo kahate ho ki kyo.n jiite ho 'Ghalib'
qismat me.n hai marane kii tamannaa koii din aur

[Style Mantra]

maze jahaa.N ke apanii nazar me.n Khaak nahii.n
sivaay Khuun-e-jigar, so jigar me.n Khaak nahii.n

magar Gubaar hue par hava u.Daa le jaaye
vagarnaa taab-o-tavaa.N baal-o-par me.n Khaak nahii.n

[Gubaar=clouds of dust, taab-o-tavaa.N=courage/strength, bal-o-par=feathers & vings ]

ye kis bahiisht_shamaail kii aamad-aamad hai
ke Gair jalvaa-e-gul raah_guzar me.n Khaak nahii.n

[bahiisht=heaven; shamaail=clothes; aamad=arrival; jalvaa-e-gul=display of flovers; raahaguzar=path ]

bhalaa use na sahii, kuchh mujhii ko raham aataa
asar mere nafas-e-be_asar me.n Khaak nahii.n

[nafas=breath]

Khayaal-e-jalvaa-e-gul se Kharaab hai maikash
sharaab_Khaane ke diivar-o-dar me.n Khaak nahii.n

huaa huu.N ishq kii Gaarat_garii se sharmi.ndaa
sivaay hasrat-e-taamiir ghar me.n Khaak nahii.n

[Gaarat_garii=destructiveness, taamiir=construction ]

hamaare sher hai.n ab sirf dil_lagii ke 'Asad'
khulaa ki faayedaa arz-e-hunar me.n Khaak nahii.n

[arz-e-hunar=display of talents ]

[Style Mantra]

maharabaa.N ho ke bulaa lo mujhe chaaho jis waqt mai.n gayaa waqt nahii.n huu.N ke phir aa bhii na sakuu.N

zauf me.n taanaa-e-aGayaar kaa shikvaa kyaa hai baat kuchh sar to nahii.n hai ke uThaa bhii na sakuu.N

[zauf=weakness, taanaa=taunt, aGayaar=enemy, shikvaa=complaint

zahar milataa hii nahii.n mujhako sitam_gar varnaa kyaa qasam hai tere milane kii ke khaa bhii na sakuu.N

[Style Mantra]

milatii hai Khuu-e-yaar se naar iltihaab me.n
kaafir huu.N gar na milatii ho raahat azaab me.n

[Khuu-e-yaar=lover's nature/behavior/habit, naar=fire, iltihaab=flame, azaab=sorrow]

kab se huu.N kyaa bataauu.N jahaa.N-e-Kharaab me.n
shab haaye hijr ko bhii rakhuu.N gar hisaab me.n

[jahaa.N-e-Kharaab=world of problems, shab=night, hijr=separation]

taa phir na intazaar me.n nii.nd aaye umr bhar
aane kaa ahad kar gaye aaye jo Khwaab me.n

[taa=so that, ahad=promise ]

qaasid ke aate aate Khat ik aur likh rakhuu.N
mai.n jaanataa huu.N jo vo likhe.nge jawaab me.n

[qaasid=messenger ]

mujh tak kab un kii bazm me.n aataa thaa daur-e-jaam
saaqii ne kuchh milaa na diyaa ho sharaab me.n

[bazm=meeting, saaqii=bar-tender ]

jo munkir-e-vafaa ho fareb us pe kyaa chale
kyuu.N badagumaa.N huu.N dost se dushman ke baab me.n

[munkir-e-vafaa=one vho denies loyalty, fareb=illusion/fraud]
[badagumaa.N=suspicious, baab=company]

mai.n muztarib huu.N vasl me.n Khauf-e-raqiib se
Daalaa hai tum ko vahm ne kis pech-o-taab me.n

[muztarib=anxious/disturbed, vasl=meeting vith the lover, Khauf=fear]
[raqiib=opponent, pech-o-taab=predicament ]

mai aur hizz-e-vasl, Khudaa_saaz baat hai
jaa.N nazr denii bhuul gayaa iztiraab me.n

[mai=bar, hizz-e-vasl=joy of meeting, Khudaa_saaz=god's gift, iztiraab=anxiety ]

hai tevarii cha.Dii huii a.ndar naqaab ke
hai ik shikan pa.Dii huii tarf-e-naqaab me.n

[shikan=wrinkle, tarf=eyelid ]

laakho.n lagaav, ik churaanaa nigaah kaa
laakho.n banaav, ik biga.Danaa itaab me.n

[itaab=anger]

vo naalaa dil me.n Khas ke baraabar jagah na paaye
jis naale se shigaaf pa.De aafataab me.n

[naalaa dil=crying heart, Khas=hay/grass, shiGaaf=crack, aafataab=sun]

vo sehr muddaa talbii me.n na kaam aaye
jis sehr se safinaa ravaa.N ho saraab me.n

[sehr=magic, muddaa talbii=fulfillme.nt of a desire;]
[safinaa=boat, ravaa.N=move, saraab=mirage]

'Ghalib' chuTii sharaab, par ab bhii kabhii kabhii
piitaa huu.N roz-e-abr-o-shab-e-maahataab me.n

[abr=clouds, roz-e-abr=cloudy day, maahataab=moon ]

[Style Mantra]

muddat huii hai yaar ko mahamaa.N kiye hue
josh-e-qadah se bazm charaaGaa.N kiye hue

[qadah=goblet ]

karataa huu.N jamaa phir jigar-e-laKht-laKht ko
arsaa huaa hai daavat-e-mizshgaa.N kiye hue

[laKht=piece, mizshgaa.N=eyelid ]

phir vazaa-e-ehatiyaat se rukane lagaa hai dam
baraso.n hue hai.n chaak girebaa.N kiye hue

[vazaa=conduct/behaviour, ehatiyaat=care, chaak=torn, girebaa.N=collar ]

phir garm_naalaa haaye sharar_baar hai nafas
muddat huii hai sair-e-charaaGaa.N kiye hue

[sharar_baar=raining sparks of fire, nafas=breath ]

phir pursish-e-jaraahat-e-dil ko chalaa hai ishq
saamaa.N-e-sad_hazaar namak_daa.N kiye hue

[pursish=enquiry, jaraahat (or jiraahat)=surgery, sad=hundred]
[namak_daa.N=container to keep salt ]

phir bhar rahaa huu.N Khaamaa-e-mizshgaa.N baa_Khuun-e-dil
saaz-e-chaman_taraazii-e-daamaa.N kiye hue

[ Khaama=pen, mizhgaa.N=eyelid, saaz=disposition, taraazii=consenting ]

baa_ham_digar hue hai.n dil-o-diidaa phir raqiib
nazzaaraa-o-Khayaal kaa saamaa.N kiye hue

[ham_digar=mutual/in betveen, saamaa.N=confront ]

dil phir tavaaf-e-kuu-e-malaamat ko jaaye hai
pi.ndaar kaa sanam_kadaa viiraa.N kiye hue

[tavaaf=circuit, kuu=lane/street, malaamat=blame]
[pi.ndaar=pride/arrogance, sanam_kadaa=temple ]

phir shauq kar rahaa hai Khariidaar kii talab
arz-e-mataa-e-aql-o-dil-o-jaa.N kiye hue

[talab=search, mataa=valuables ]

dau.De hai phir har ek gul-o-laalaa par Khayaal
sad_gul_sitaa.N nigaah kaa saamaa.N kiye hue

phir chaahataa huu.N naamaa-e-dil_daar kholanaa
jaa.N nazar-e-dil_farebii-e-unvaa.N kiye hue

[naama-e-dildaar=love letter, unvaa.N=title]

maa.Nge hai phir kisii ko lab-e-baam par havas
zulf-e-siyaah ruKh pe pareshaa.N kiye hue

[lab-e-baam=the corner of a terrace, siyaah=black/dark ]

chaahe phir kisii ko muqaabil me.n aarazuu
surme se tez dashnaa-e-mizshgaa.N kiye hue

[muqaabil=confronting, dashnaa=dagger, mizshgaa.N=eyelids ]

ik nau_bahaar-e-naaz ko taake hai phir nigaah
chehara furoG-e-mai se gulistaa.N kiye hue

[nau_bahaar-e-naaz=lover, furoG=light/bright ]

phir jii me.n hai ki dar pe kisii ke pa.De rahe.n
sar zer baar-e-minnat-e-darbaa.N kiye hue

[sar zer baare=bowed head]

jii Dhuu.NDhataa hai phir vahii fursat ke raat din
baiThe rahe.n tasavvur-e-jaanaa.N kiye hue

[tasavvur=imagination]

'Ghalib' hame.n na chhe.D ki phir josh-e-ashk se
baiThe hai.n ham tahayyaa-e-tuufaa.N kiye hue

[tahayyaa=determined ]