[easy_sums_life1]

Who din ab kuch door nahiin!!
Jab appas mein krne wali sab baatein bhi
Internet pe hon gi,

Jazbey…..nuqton aur lakeeron ki boli mein baat karein ge
Lafzon ki imdaad liye bin
ik dooje k khawab aur khadshay
Parh payein ge,
Dhaaga dhaga khamoshi se apne geet aur khawab bunein ge!!
Khushboo dekhein,rang sunay ge!!


Who din ab kuch door nahiin!!
Waqt samandar ki lehron mein tanha tanha chalne wale
Jimson ki awaaz ko sun kar ik dooje ki samat bahein ge
Pal do pal ki wehshat mein ik saath rahein ge
Aur phi raise ho jaye ge,
Jaise yeh sohbat hi unke jeevan bhar ka surmaaya ho

Jis se agle waqton waale
Nasal,qabeelay.qaum wagaira ki pehchane krte the aur…
Mil kar jeetay marte the!!


Who din ab kuch door nahiin!!
Har ik baat adhori hogi
Ik hi ghar k do kamron mein
Laakhon mell ki doori hogi
Raddi ka anbar sa honge jitney rishtey naate hain
Chaand nagar ki sair ko khulqat aise aati jaati hogi
Jaise hum baazaron mein shopping krne jaate hain


Who din ab kuch door nahiin
Jab ik soch aur ik hi shaklon wale,adam zaade
Adamzad tu shayad honge…
Laiken unki shaksiat k saare johar


Aankhon aur baalon ki rangat
Khushiyaan,mehfil,tanhai
Fikar,tadbar,danai
Sher,gina,tasweer
Mustaqbil mein aane waale lamhon ki taqdeer
Sab kuch unke jinz k andar hasb-e-zaroorat shaamil hoga
Saari baatein azbar hongi,har ik fail mukamal hoga

Who din ab kuch door nahiin!!
Insaani jimson k aizaa
Faltu purzon ki surat showcase mein rakhe honge
Teesri dunyaan k dil waale
Pehli duniyaan k logon ko aankhein khol k nafklein get u…
Suraj aandha ho jaye ga!

Aaqaon k sinon mein jab mehkumon k dil dharkein ge
Sab kuch ulta ho jaaye ga..

Who din ab kuch door nahiin!!
Jab aankhon se ujhal manzar bilkul saaf nazar aayein ge..!!
Aino mein aqs k badle number jalte bhujte hon ge!!
Log mashhenein ban jaayein ge!!
Takhmeenon k baish-o-kam mein har ik chez izaafi hogi..
Jurm bane ge pyaar mohaabaat dil ki maut,talafi hogi!
Dhund jamegi sino mein barf uge gi paharon per
Roboton se milte julte nqsh bane ge cheheron per..
Ik hi waqt mein jin ki aankhein
Aage peechay dekh saakein gi..
Kaan,samandar k neechay ki awaazein pehchaan saakein ge,
Taaron k us paar hai kya kya!!
Yeh bhi shayad jaan saakein ge,
Sab kuch ulta hojaaye ga….

Who din ab kuch door nahiin!!
Jab yeh sab kuch ‘’hone wala’’ hojaye ga!
Raat abhi tak baaqi hogi ujaala ho jaaye ga..
Har ik khawab aur har ik jazba,
Maazi k marhoom dino ka aik hawala ho jaye ga

Kal k adam k hathon mein har ik kufal ki kunji hogi..
Lamhe uske chakar hon har ik saat baandi hogi,
Dast-e-hunar ki fankaari se,aqal ki roshan mashal se..
Dinya waise hojaye gi,jaisi usne sochi hogi!!

Yeh tu sab kuch ho jaye ga,phir bhi dil yeh kehta hai!
‘’yeh jo chaaron taraf humaare,waqt ka dariya beheta hai..
kis k hokum se chalta hai aur kis ki khoj mein rehta hai?
Jo kuch hum ne jaan liya hai…yeh tu hai tehqeeq!
Apni asal mein laiken cheezein kis ki hain takhleeq??

Kis ne ki arzaani humko yeh saari taufeeq?
Jis ka bhed na khul paaye who ik sira tu phir bhi hai!!
Is saari taameer mein yani ik khula tu phir bhi hai!!
Hasti k is khel k peechay,aik khuda tu phir bhi hai!!