[MaYa.000]

Tan pe orrhe huey sadiyon ka dhuaaN shaam-e-firaaq
Dil mein utri hai ajab sokhta jaaN shaam-e-firaaq

Khwab ki raakh sameitte gi bikhar jaaye gi
Soorat-e-sho'la-e-khursheed rukhaaN shaam-e-firaaq

Baais-e-raunaq-e-arbaab-e-junooN veeraani
Haasil-e-wehshat-e-aashufta-saraaN shaam-e-firaaq

Tere mere sabhi iqraar wahin bikhre they
Sar jhukaaye huey baithi hai jahaaN shaam-e-firaaq

Apne maathe pe saja le tere rukhsaar ka chaand
Itni khush-bakht o falak-naaz kahaaN shaam-e-firaaq

Dhalte dhalte bhi sitaaron ka lahu maangti hai
Meri bujhti hui aankhon mein ravaaN shaam-e-firaaq

Ab to malboos badal kaakul-e-be-rabt sanwaaar
Bujh gaeeN shehr ki sab raushniyaaN shaam-e-firaaq

Kitni sadiyon ki thakan is ne sameitti Mohsin
Ye alag baat k ab tak hai jawaaN shaam-e-firaaq